PACÍFICO KUCHAPAK ASIA LLAKTA ECUADOR LLAKTAWAN KIMIRINAKUYTA SINCHIYACHINA RIMAN
Asia – Pacífico yaku pampamanta kamachiy killkakkuna, Foro APPF tantaripi, Quito llaktapi rurarikukpi, Mamallakta Tantanakuy pushak ukuman kayashka karka, chaypimi Ecuador llaktawan tawka llankaykunata rurankapa munay hawa rimanakurkakuna.
Gabriela Rivadeneira Mamallakta Tantanakuyta pushak, kamachiy killkakkunapak napaykunata chaskirka, mintalaywan, pachamamapak llankaywan, istallakta ushaywan, shuktak llankaykunawanpash ishkantin llakta llankana nirka.
Tantari kallaripika, Hirofumi Nakasone Japón llaktapi kamachiy killkakta pushak, kamachiy killkakkunapura llankana nirka, imashinami mintalaypi, yanapanakuypi llankana nirka.
Kay Canadá llaktamanta, Leonard Michael Wallace kamachiy killkak, shinallatak yuyayta charirka, payka Grupo de Amistad Ecuador– Canadá tantarita sinchiyachina nirka, kamachiy killkakaypi ishkantin llaktawan shuk yuyarita charina nirka. Ecuador llakta shamuk Foro APPF hatun tantaripi sinchita rikuchun, chayka chinchasuyu Apya-yalapimi kanka nirka.
México llaktamanta shamuk, istallaktapura tantarishpa mushuk llankaykunata tantaka nirka, shina wakchayaykunata, kamayta, manchachita pitinkapa tukuy llaktakuna shuk yuyaywanlla llankana nirka.
Kay Marco Antonio Nuñez kmachiy killkak Chile shamuk kamachiy killkakkunata ñawparka. Kaypimi ishkantin llakta maki kushpa llankashkamanta rimarka, kamachiy killkay sumak yachaykunata charishkata rantinpurashkata willarkakuna.
Kay Latin Apya-yalapi Parlasur (Parlamento de Unasur) tantarita rurana yuyayka may mutsurikmi kan nirka, Bolivia llaktapi tantarishun nirka. Tukuy llaktakunami imashina wakchayayta anchuchina, chullanchullan kawsayta allichinkapa paktana nirka.
Kay Australia llaktamanta Bronwyn Bishop ñawpashka chamurka, payka Ecuador llaktata riksinkapa shamuna hawa ashtawankarin rimarka, ishkantin Mamallaktakuna llankankapa punkuta paskana nirka, ashtawankarin yachaypi, riksina karmapi llankana nirka.
Ña chishipi, Ecuador llaktamanta kachashka María Augusta Calle, Mamallakta Tantanakuypak Comisión de Soberanía y Relaciones Internacionales kipa pushak, ista kamachiy killkakkunata chaskirka.
Chay Singapur llaktamanta pushak, Penny Low ñawpashka, Asia – Pacífico kimirik llaktakunawan kawsaykamayta tankana nirka, chaypakka kay Foro Parlamentario Asia Pacífico tantaripi yuyarikunami hatun maymutsurik kan nirka.
Kay Nueva Zelanda llaktamanta, kachashkata pushak, Linsay Tisch kamachik, Ecuador llaktawan, América Latina llaktakunawan kimirina nirka. Mamallaktakuna tantarishpa llankana yuyaywan kimirishpa yanaparka.
Kay Indonesia llaktamanta kachashka, Fadil Zon kamachiy killkak ñawpashka, Ecuador llaktaka “ Latin Apya-yala llaktakunapak punkumi kan nishpa chanirka”, ishkay Mamallaktamanta pushakkuna shamushkata hawaman churarka, Mamallatakuna kimirinakuyka, kay hatun ushaymi nirka.
Kay kamachikkuna shamuy tukuripi Micronesia llakta chayamurka, paykunaka, Isaac Fingir kamachiy killkak ñawpashka karka, Ecuador llakta pachamamata kamana yuyayta yanaparka, allpapacha ama kunukyachun nishpa, mamakucha huntashpa paykunapak llaktata ama llakichichun munashpa yanaparka.
Kayna, 12 puncha, kulla killapi, Rusia llakta, Ecuador llaktawan kimirinakuy sinchiyachun nirka, chaypak Mamallakta Tantanakuyta pushakkuna, Valentina Matvienko, Gabriela Rivadeneira, kamachiykunawan yanapankapa shuk yuyarinakuyta killkarkakuna.
JS/jc-kichwa